L’añu que vivimos peligrosamente

Francisco Álvarez-Cascos convoca elecciones anticipaes pal próximu 25 de marzu. Nun duró siquiera un añu como presidente d’Asturies y ta por ver que repita (en realidá, hasta ta por ver que se presente). Con too y con eso, y con durar menos nel cargu qu’Antonio Trevín, ye previsible que los meses que gobernó (por llamalo asina) seyan oxetu d’estudiu nel futuru. Tamién la so figura, troquelada sobre’l fondu borrinosu de la nuesa historia institucional.

Dende 1983, añu en que se celebraron les primeres elecciones autonómiques, Asturies tuvo presidentes de tou tipu: un intelectual, un histrión, un oficinista, un señor con gafes y Areces (que constitúi, él mesmu, una categoría). Lo que nunca tuviéremos, nin necesidá qu’había, fuera un presidente bonapartista. Cierto, lo de Cascos foi un bonapartismu de serie B, una especie de hegelianismu de bazar chinu, y tan llenu de ruíu y de furia que s’autoconsumió en tiempu récord. Les sos maneres yeren, y son, de mayoría absoluta, y yeren, y serán, incompatibles col ritual d’intercambiu de favores que los periódicos suelen llamar diálogu: pa gobernar en zapatielles fai falta, como poco, un exércitu que te respalde. Si a too ello-y sumamos que la so base electoral taba formada por un heteroxeneu mestranzu antisistema, nun va estrañanos por demás que too acabara como acabó.

Con esti xostrazu salimos toos ganando, y nostante’l futuru inmediatu nun pinta tampoco mui de fiar. Sí, ye posible, anque non plausible, que too quede igual, o incluso que Cascos, de presentase, gane en marzu por una mayoría más amplia. Pero esto arreciende a fin de temporada, y pinta más realista un escenariu d’estética barroca, con Cherines o Javier Fernández interpretando en sordina los madrigales de moda en Madrid. Un poco lo de tola vida.

Anuncios

3 comentarios sobre “L’añu que vivimos peligrosamente

  1. Nun soi sospechosu de simpatíes p’hacia Cascos y el so grupúsculu cutre y llamentable (por cada Vallaure había 30 Rubieras) pero abúltame qu’esta situación lo que pon sobremanera de manifiestu ye la forma mendaz, mezquina y despreciable na que PP y PSOE anteponen los sos intereses de partíu al interés de los asturianos. Son les elecciones de nun votar, de cuspialos a toos na cara. Nun creo que ni n’Albacete tengan políticos tan pequeños como los que sufrimos n’Asturies.

  2. Nun m’alcuerdo quién dixo aquello de “Un drama nun se da cuando hai qu’escoyer ente una cosa bona y una mala, sinón cuando hai qu’escoyer ente dos coses males”. N’Asturies hai un dichu que fala de lo mesmo. Diz: “Mal pela ponte, peor pel ríu”. Ye verdá que Cascos ye… bono, Cascos ye lo que paez. Sicasí, les úniques alternatives (con posibilidaes reales) al FAC son tan deprimentemente conocíes, tan resignadamente grises, que yo echábalo a cara o cruz: mayormente pa ver si sal cantu.

  3. Nun vos quito la razón a nengún de los dos. Sicasí, y una y bones ún contaba tar yá vacunáu contra la prepotencia de los que nos gobiernen, lo del FAC superó toles marques. Pero nun perdamos la esperanza: igual una d’estes sal cantu.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s