Un asuntu menor

Hai un par de selmanes conocióse que l’Asociación d’Escritores d’Asturies nun diba convocar esti añu los Premios de la Crítica pa obres publicaes en llingua asturiana, o lo que ye lo mesmo: a los Premios de la Crítica, convocaos y concedíos añalmente por esa asociación, namás diben poder optar obres escrites en llingua castellana. Dicho asina, suena mal. Dicho de cualaquier otra manera, tamién. Efectivamente, la mayoría de los socios d’esa asociación escriben namás en castellanu (pero nun foi siempre asina), y tamién ye verdá que la mayoría de los escritores que trabayen n’Asturies (en cualquier idioma) nin son miembros de l’asociación nin-yos importa demasiao lo qu’esta faiga o dexe de facer (pero de nuevu pue dicise qu’esto paez que foi a más últimamente). A les clares voi dicilo, y espero que nun-y paeza mal a naide: l’Asociación d’Escritores d’Asturies ye una asociación minoritaria y d’escasu prestixu, poro les sos decisiones, por absurdes que paezan, nin van cambiar el mundu nin van tener efectu dalu na lliteratura asturiana.

Agora bien, si la decisión d’escluir al asturianu de los Premios de la Crítica la tomara la Tertulia Cultural El Garrapiellu, o la Peña Sportinguista de Turón, entiendo yo que naide nun diba echar mucho tres d’ello, quitando los socios que nun-yos gustara la midida. Yo, a lo menos, como escritor, nun diba sentime agraviáu nin ofendíu. Pero que lo faiga una asociación que se llama Asociación d’Escritores d’Asturies, por más que yo nun seya sociu d’ella nin pensara nunca en selo (nin naide me lo pidiera), aféctame: porque na so denominación ta implícita la voluntá de representar a un colectivu del que, dende’l mio particular individualismu, soi parte. Por eso firmé, xunto con otres más de doscientes persones, el Manifiestu de protesta pola exclusión de les obres en llingua asturiana de los Premios de la Crítica.

Conté que con eso bastaba y sinceramente pensé que l’asociación diba rectificar. Húbolos que pensaron diferente. Carlos Suari, ún de los munchos escritores que recibieron el Premiu de la Crítica, decidió nel intre devolve-y a l’asociación el troféu que-y concedieren. Tamos falando d’una pequeña escultura de Jaime Herrero, un artista al qu’aprecio personal y profesionalmente. Yo recibí esi mesmu premiu en dos ocasiones, asina que tengo dos escultures, y la verdá, avagábame desfaceme d’elles, más que nada por respetu al so autor. Igual foi eso, pero, insisto, taba convencíu de que la razón diba ganar esta vegada.

Va ser que non: hai unes hores, l’Asociación d’Escritores d’Asturies (AEA, pa en delantre) fixo públicu un comunicáu sobre les reacciones que llevantó la so decisión. El comunicáu vien firmáu pol so presidente, Mariano Arias Páramo, y nun merez un análisis mui posáu porque nun hai nél nada qu’analizar (refiérome al comunicáu, non al presidente). Agora bien, un par de comentarios sí paguen la pena. Yo, a lo menos, siéntome obligáu a pidi-y al señor Arias Páramo que, si querer nun quier rectificar, polo menos que nun falte. Porque esi tonucu de seminarista resabiáu nun ye’l más adecuáu pa un comunicáu que va lleese como espresión de lo que piensen los socios de l’AEA. Dalgún amigu tengo que sigue siendo miembru d’esa asociación, y francamente nun soi pa imaxinalu gastando eses maneres.

Pela mio parte, he dicir que, si de lo que se trata ye d’insultar, acepto’l brinde, pero diba agradecer un pocoñín más d’estilu en dalguién que presume de presidir una asociación de tantu ringorrango. Mesmo que pasa nel mus, o nun lleves xuegu o faes bien les señes, pero llevar xuegu y que se te note ye perder a lo bobo. Equí’l señor Arias Páramo lleva xuegu (un bon xuegu de prexuicios) pero nótase-y per toes partes la voluntá d’escondelu, quiciás porque yá nun tamos naquella época onde cualquier aspirante a intelectual podía dicir toles faltosaes del mundu a propósitu de la llingua asturiana y de los qu’escribimos nella. Que tenga que facer l’esfuerzu de ser políticamente correctu ye un síntoma de que vamos progresando, igual que lo ye comprobar que la mayoría de los escritores asturianos, asociaos o non, nun cayeron na trampa saducea de ver nesti incidente una causa de discordia ente los qu’escriben nun idioma y los qu’escriben n’otru. A esti pasu, nun pierdo la esperanza de que dalgún día podamos aforranos esti tipu d’espectáculos.

Namás una cita del comunicáu en cuestión, y vamos acabando: “Apreciamos que los firmantes del Manifiestu se interesen tanto por estos premios que han despreciado con su ausencia continuada a la hora de trabajar para conseguirlos y en muchos casos con su indiferencia”. Yo lo único qu’aprecio ye que los dos Premios de la Crítica que llogré foron, a xuiciu de l’AEA, inmerecíos, yá que nun trabayé nada pa consiguilos. Polo mesmo, agora sí, y por muncho que me duelga l’espreciu involuntariu que-y faigo a Jaime Herrero, devuélvo-ylos a l’AEA encantáu de la vida, si con esto me garantiza’l señor Arias Páramo que de agora pa en delantre va ser verdá que “la AEA, en tanto que carece de carácter profesional, no puede bajo ningún concepto arrogarse el derecho de representar a todos los escritores de Asturias”. Entiendo que, si esto nun ye namás retórica barato, l’AEA va facer los trámites correspondientes pa busca-y a l’asociación una denominación más adecuada. Ofreceríame de bona llei a proponer unes cuantes que fueren acordies cola sensibilidá del so presidente, pero nun cuento que los sos socios, o munchos d’ellos, les merecieren.

Agora yá podemos dexar el tema y ocupanos d’asuntos más serios.

 

Anuncios

3 comentarios sobre “Un asuntu menor

  1. Yo soi a columbrar dos opciones: entamar una asociación d’escritores alternativa, más abierta y que nun estreme ente escritores d’una o otra llingua (sobre manera por que habralos qu’empleguen les dos y nun quedrán alloriar por sentise neto integraos y segregaos); o bien entamar una asociación d’escritores asturianos en llingua asturiana, y facer una mena de discriminación positiva. Cola xida de la crisis…

  2. Menos mal que es un asunto menor. Porque menuda polemica que ha levantado. Evidentemente entiendo que estes molesto por esa decisión, pero creo que si lees detenidamente ese comunicado no se está faltando a nadie. Como aclaración decir que soy un mero socio de la AEA y no formo parte de la Junta Directiva.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s