Pratchett como hipótesis

[La estrena d’un mediu de comunicación siempre ye una bona noticia. Cuantimás n’Asturies, depués del desaniciu de Les Noticies y La Voz de Asturias. Asturias 24 echa a andar, pa calentar motores, con un blog d’opinión nel que publiqué, ayeri, esti artículu.]

Terry Pratchett ye famosu por crear Mundodisco, materia y escenariu de cuasi toles sos noveles. Igual s’ufana d’ello, y fai bien. Hai creaciones de les que nun ta tan arguyosu. Son Cristóbal Montoro y Fernando Lastra.

Cuando Pratchett creó a Montoro, esti brotó de la cabeza del novelista inglés completamente formáu, igual qu’Atenea de la de Zeus. Lo malo d’eses divinidaes prêt-à-porter ye que suelen presumir d’independencia de criteriu, y son una bomba de reloxería pa universos ficcionales tan intrínsecamente deterministes como’l de Mundodisco. Pratchett tien millones de llectores y un altu nivel d’esixencia: nel intre tuvo que ver venir el patinazu, asina que lu mandó pal reinu d’España, un universu paralelu al de Mundodisco y, según sabemos, igual de ficcional. La criatura dio en ministru, y lo que vieno a continuación sábelo tol mundu. En Mundodisco tovía se parten de risa cuando falen d’ello.

Montoro nun fala: amenaza, y failo d’esa manera repunante y llandia propia de la clerigaya. Esa pulsión dominica llévalu a invertir en retórica belicista, y nun ye la primer vez qu’amenaza a colectivos enteros, por nun dicir qu’a abstracciones. Lo que tien contra Asturies ye pura vesania: l’añu pasáu diba interveninos, y esti, como l’amenaza d’intervención funcionó y acabemos el cursu con superávit, retáyanos la inversión pública un 31,6 % y regálanos, en cuenta d’ella, una llección d’economía política y moral d’eses que paga la FAES porque la FAES lo val: que si l’estáu sigue financiando infraestructures, pue ser que nos saque de la probeza, pero non de la inorancia, y pa eso tenemos ministros, pa que nos ayuden a ganar un doctoráu doloris causa en neolliberalismu.

Un mal día tienlu cualquiera: lo de Montoro podíemos perdoná-ylo a Pratchett de nun ser porque, conforme al gustu pola simetría que suelen vistir los novelistes, de siguío vio la necesidá de perfilar tamién a Fernando Lastra. Montoro foi una continxencia, pero Lastra yera necesariu: pa que’l ministru fuera verosímil, había qu’inventar al voceru de la FSA.

Efectivamente, nun s’entiende qu’un ministru español amenace tan de siguío y con tanta contundencia a una comunidá autónoma y nun pase absolutamente nada. Si tal cosa ye creíble, ello débese a la idiosincrasia del asturianu metíu en política, del que Fernando Lastra ye paradigma y primer analogáu. Tol mundu sabe qu’hai mui pocos políticos asturianos: lo qu’hai hasta aburrir ye asturianos metíos en política, d’esos que cuiden que la política ye un despachu, el despachu un chigre, y el chigre, en fin, la totalidá del ser. En chigre sobren los argumentos, lo que cuenta ye l’actitú. Y actitú ye lo que-y sobra a Lastra p’avisar de que la llei electoral asturiana igual non porque pa qué. ¿Diálogu y maneres? ¿Negociación y modales? Pa eso hai qu’habitar otru universu de discursu. Nel de Lastra, que ye, en fin y en pos, el de la política asturiana ensembre (Carlos Rubiera nun ye más que la so versión hiperbólica), llévase más la bocayada y la fachenda. Con defensores asina, lo anormal nun ye Montoro: lo anormal ye que nun tengamos una llista d’espera d’abusones.

Terry Pratchett como hipótesis. O eso, o ye que n’Asturies entendemos que lo de ser comunidá autónoma significa escoyer al más faltosu de la espicha pa que nos dexe llamber la forgaxa del suelu. El hoc signo del nuesu escudu nun ye motivu d’arguyu. Ye pura invitación a faenos bullying.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s