Tricolor

Estándar

Tolos años ye igual pero distinto. Cada catorce d’abril, la guerra de banderes xorrez col mesmu puxu que l’añu anterior, pero non tolos catorce d’abril se dan les mesmes condiciones ambientales y pudiera dicise que cada aniversariu de la II República vien con matices nuevos, seique pol enclín a la mezclienda y a lo informe que caracteriza según T.S. Eliot al mes más cruel, seique porque pesa l’efectu acumulativu d’un desalcuentru históricu que tovía nun se resolvió nin lleva camín de resolvese. Na cumbria del procesu Noos, y cola monarquía pasando pel so momentu más impopular dende hai más de trenta años, la celebración d’esti 2014 volvió a convocar a les voces más preocupaes del espectru políticu, a saber, los dos partíos de l’alternancia, emperraos dambos dos en que la bandera tricolor ye símbolu de discordia y defendiendo a capa y espada esi pautu de difuntos que roblaron en 1978. Entregaos unos (PP) a la pura y simple distorsión de la historia, hasta’l puntu de convertir a la II República en causante y non víctima del golpe fascista de 1936, y envolubraos otros (PSOE) nel supuestu pragmatismu del que prefier barrer lo puerco embaxo l’alfombra con tal de nun facer una llimpieza en condiciones, el resultáu ye un choque de monarcofilies ensin monárquicos, como si’l réxime aspirara a una monarquía de rei invisible, asumida na práctica como una república presidencialista que, a falta d’elecciones presidenciales, solo ye concebible como una dictadura transitoria del partíu más votáu.

Entiende ún eses inercies y eses inepcies, típiques les dos d’un pensamientu acomodaticiu, volcáu na defensa del interés particular, pero cuesta más entender la falta de sentíu común con que dalgunes, solo dalgunes, de les voces más critiques col réxime aborden la cuestión republicana. D’un llau, republicanos convictos y confesos que nun son capaces d’imaxinar otru marcu constitucional que’l de 1931 y consideren que restaurar la república ye más urxente qu’instaurala. D’otru llau, maximalistes de toles edaes y condiciones que consideren la república un oxetivu enxencle, poca cosa en comparanza cola abolición del capitalismu o la socialización de los medios de producción. Los primeros acaben acercando los sos plantegamientos a les tesis del PP, anque dende la otra banda del tableru, al reducir el debate sobre la forma d’estáu a un alderique sobre la historia y les mancadures del pasáu. Los segundos acaben coincidiendo col PSOE en que siempre hai cuestiones muncho más urxentes que la república.

A los primeros vencéyame la pretensión, totalmente lexítima, de rehabilitar a les víctimes del fascismu, pero eso nun quita pa que reconoza qu’a esta monarquía nun la va sustituir una versión 2.0 de la II República: habrá de ser la república que quieran los vivos, non los muertos, nin siquiera los nuestros muertos. A los segundos xúneme seique la intuición, necesaria anque inútil, de qu’una república nun ye garantía de xusticia social, pero tampoco eso m’impide constatar que más inxusticies permite una monarquía y que bien pudiera pasar que, de tanto esperar pol asaltu a la contradicción principal, dexáremos ensin resolver la contradicción de primer planu, y yá me perdonarán esti lapsus maoísta si lo tienen a bien.

Queden a la postre los terceros, independentistes d’equí y d’acullá, que desdexen la república por española más que por república. Bien mirao, tien la so lóxica, y si se lo mira mal, tamién. Sicasí, nun acabo d’entender por qué hai qu’añedi-y al presuntu supliciu de ser español l’evidente incoveniente de ser súbditu. Otra cosa ye la incapacidá habitual pa pensar con conceptos en cuenta de facelo con trapos de colores, pero pamidea qu’esi reproche merecémoslu la mayoría, con soberaníes o ensin elles, caún na so república y el rei na de toos.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s