Tres mieos mediáticos

Estándar

Atendiendo pa lo que nos dicen dellos medios mui influyentes, hai bien de razones pa tener mieu: una fola de populismu amenaza con estrizar la democracia modélica que los españoles se dieron en 1978 llibremente y ensin presiones de nengún tipu. Esi populismu, afaláu y hai quien diz que sufragáu por potencies estranxeres, métese pelos televisores y los portátiles, remanez de los teléfonos móviles y les tabletes y, parafrasiando al inolvidable sheriff de Primera plana, yá ta empezando a royer la bandera rojigualda. Por si fuera poco, esos mesmos medios descúbrennos la presencia, ente nós, d’anarquistes infiltraos (qu’a la fuerza tienen que ser violentos, nun se sabe si por anarquistes o por infiltraos) y alértennos del sempiternu peligru de que rompa España, nun seya que de tanto tremecer de populismu y anarquismu perdamos el vezu d’asustanos polo de siempre: pola balcanización inevitable.

La estratexa del mieu abarca asina los tres tiempos verbales: el pasáu, el presente y el futuru. El presente, cómo non, ye un presente eternu, porque eternes son les esencies, y nun digamos yá les nacionales: cuando ún naz y vive dientro d’una esencia nacional destinada a permanecer pa siempre enxamás, a la fuerza tien que s’asustar énte la perspectiva de qu’esa eternidá nun seya tal y s’esmigaye de la nueche a la mañana esi solar esencial de la España metafísica. Por eso esi mieu nun va abandonar los nuesos corazones, solo qu’agora va tener que convivir con dos xenialidaes auténtiques: la resurrección d’una caricatura (l’anarquista escalforiáu con bomba y antifaz, el Mateo Morral de la Segunda Restauración Borbónica, l’hipotéticu Luigi Lucheni d’una igual d’hipotética Sissi Ortiz) y la construcción d’un nuevu demoniu de maneres posmodernes (el líder encoletáu que pretende sustituir los engranaxes institucionales por una aclamación acrítica y pasional más propia de xentecaya que de ciudadanos responsables). Como’l mieu ye selectivu, habrá quien seya más receptivu a la novedá populista qu’al cocu ácrata de tola vida, pero por si acasu ehí sigue’l Que Se Rompe España como alvertencia infalible por si fallen les otres dos.

Seya como quier, poca efectividá pue tener la pantasma del anarquismu nuna época na qu’alpenes s’estudia historia y onde, amás, los mesmos aparatos ideolóxicos qu’agora la saquen a rellucir lleven años emponderando a los anarquistes como románticos lluchadores pola llibertá frente al cocu comunista, soviéticu y totalitariu. Tocante al llamáu populismu mediáticu, va costar imponelu como enemigu terrible cuando la mayoría de los medios faen tolo posible por aprovechase d’él pa vender noticies y cuando, per otra parte, hasta’l PSOE ta empezando a copiar les sos maneres (tanto ye asina, que les primaries socialistes nun va ganales el candidatu con más avales, sinón el candidatu con menos centímetros de tiru nos pantalones: cuanto más altu’l tiru, más perteneces a la casta, y a ver ónde va Pérez Tapias con esi estilismu ochenteru).

En tiempos de tribulación, meyor nun facer mudanza, dicía’l santu de Loyola, y asina ye que, puestos a difundir pánicos, el de la balcanización siga siendo un caballu ganador. Sicasí, nun ye seguro que’l común se decante pola España eterna frente a esa especie de Yugoslavia automontable que prefiguren ciertos medios, y en cualquier casu, con esti telón de fondu d’aforamientos reales y europensionaos con SICAV incrustada, tampoco paez mui temible la tarrecida balcanización, cuantimás si la única alternativa ye esa vulcanización constante de derechos, llibertaes y condiciones d’esistencia que los medios escuenden pero’l públicu esperimenta día a día.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s