Grita tiburón

Estándar

Ye un pozu de sabiduría l’alcalde d’Amity, la ciudá turística onde se desarrolla’l Tiburón de Steven Spielberg. Obsesionáu por abrir les playes el 4 de xunetu, fiesta nacional, l’alcalde fai tolo posible por esconder o maquillar qu’hai una amenaza bien grave pa los bañistes. La so posición esprésala perfecto cuando-y diz al xefe Brody: “Grites ‘barracuda’ y tol mundu diz: ‘Bueno, ¿y qué?’. Pero grites ‘tiburón’ y alón la temporada de branu”.

Hai unes selmanes, supimos pola prensa que David González Medina, actual presidente del PP xixonés (daquella solo aspirante), fuera condenáu por tráficu de hachís y sancionáu por consumu y tenencia de cocaína. Soi de los qu’esi día, lleendo’l periódicu, pensó: “Bueno, ¿y qué?”. Pero de sobra sabemos que munchos llectores (nun voi dicir si la mayoría o non) entendieron claramente: “Tiburón”.

Esta selmana, foi Íñigo Errejón el que saltó a la paliestra por tener un contratu cola universidá de Málaga que, según dellos medios de comunicación, son incompatibles cola so actividá en Podemos. El tiburón nesti casu yera d’otru xeitu, pero igual de peligrosu pa los bañistes: si a González Medina-y gritaron “drogadictu”, a Errejón gritáron-y “intelectual”, cosa que n’España ye guañu de llevantos y motivu de conflictos. Faltó-y tiempu a la presidenta andaluza, Susana Díaz, pa pidir una investigación de los fechos, conducta exemplar que podía ser muncho más exemplar si nun fuera pol so calter excepcional. Nun perdamos la esperanza en qu’esi celu se xeneralice y dalgún día s’aplique tamién a otres persones menos comprometíes con alternatives de gobiernu.

L’argumentu ad hominem ye un recursu retóricu mui venerable y, contra lo qu’a veces se diz, mui lexítimu. Aristóteles, nos Tópicos, deféndelu como estratexa pa poner en cuestión al oponente que, nuna disputa, contravién les regles del diálogu, xugando con dos baraxes a la vez. Si yo mantengo, por exemplu, qu’hai que reducir el gastu militar y a continuación argumento a favor d’aumentar el presupuestu del exércitu, ye lexítimo que’l mio oponente me llame al orde por tar contraviniendo les mios propies premises y faciendo imposible que discutamos de manera ordenada.

Agora bien, usar l’argumentu ad hominem como recursu únicu y convertilu, amás, n’ataque frontal contra la integridá d’un adversariu, nun ye solo contrario a les regles elementales del debate racional, sinón que tamién ye un signu de qu’en realidá nun se quier debatir nada. Trátase solo de poner el focu nel adversariu, non nes sos propuestes, como si estes pasaren a un segundu planu al gritar “tiburón”: lo importante ye que cunda’l pánicu.

Hai ente les elites polítiques un nerviosismu xustificáu y comprensible: per vez primera en munchos años, los sillones tiemblen embaxo les ñalgues y más d’ún va tener que pensar n’atopar un trabayu pal que tea medianamente cualificáu. D’esi xeitu, compréndese que tiren d’artillería y empiecen a atropar información como’l qu’atropa munición pa defender un blocao. Ye comprensible, sí, pero una torpeza mayúscula, non solo poles intenciones que delata, sinón tamién por da-y al adversariu la oportunidá de contraatacar coles mesmes armes. Los miembros d’eses elites, o a lo menos los sos asesores, munchos d’ellos pagaos con perres publiques, debieren saber que nesi xuegu lleven les de perder, y que nun ye buena receta amenazar con un palu al que tien contra ti un misil tierra-aire. Pa que depués pidan concreción y propuestes programátiques: tán encerrizaos en defender les sos posiciones apelando a les pasiones y al enfadu ciudadanu, y lo que nun ven ye que la mayoría, cuando ellos griten “tiburón”, lo que ve ye a un tiburón gritando “barracuda”.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s