L’amiga falsa

A Grecia lléga-y una convocatoria d’elecciones anticipaes y con ella un avisu de bomba: la Comisión Europea diz-yos bien claro a los griegos que tonteríes les xustes y qu’a ver si vamos tener un disgustu por una Syriza de más o de menos. Los griegos, de momentu, nun dicen nada, básicamente porque yá deben tar avezaos a que la so voz nun cuente gran cosa. Ye de suponer que se faigan sentir dientro d’un mes. Por si acasu, el FMI yá suspendió’l plan de rescate y agora toca campaña electoral y probar suerte a ver si d’esta pincha la esquierda, qu’hai munches perrres en xuegu. Pero tamién ye muncho lo que se xueguen los griegos y, a xulgar polo que venimos viendo estos últimos años, nun da la sensación de que vayan a dase a la primera.

En metá del torbolín, llega Marine Le Pen y emite un comunicáu d’esos que quiten el sueñu. Curioso que la cabezalera del Frente Nacional nun faiga nenguna referencia a los nazis d’Alborecer Doráu que prediquen en tierres griegues la so mesma medicina. Le Pen sabe esconder los nunchakos cuando ve qu’hai réditu electoral en perspectiva y márcase una d’eses fintes dialéctiques que son yá distintivu de la casa: norabona al pueblu griegu pola so llucha contra la hidra europea. Cualquiera que llea esi comunicáu ensin ver quién lu firma, diba tenelo difícil p’alliniar a l’autora ente la tropa de la estrema derecha.

Muncho se tien movío’l mapa políticu européu desque’l pá de Le Pen xorrascaba la indignación poujadista contra los inmigrantes. La fía xuega agora a vistise de mariscala republicana y nun paez que la estratexa tea saliéndo-y mal del too, en vista del ruinosu panorama de la esquierda francesa y teniendo en cuenta qu’Hollande tien yá más d’ectoplasma que de calabre políticu. La estrema derecha francesa xuega a ser l’ecu de la esquierda radical del sur d’Europa, y esa oportunidá d’alliniar dambes orielles del tableru nun van dexala pasar los medios de comunicación más sumisos cola Troika: enfotaos n’oponer responsabilidá contra populismu, esborrien l’elementu fundamental de la confrontación ente eses dos orielles, a saber: l’apelación directa de Le Pen al imaxinariu nacional uquiera que lu alcuentre. D’ehí que cualquier desplazamiento de les fiches pel tableru vaya ser catalogáu por esos medios como un ataque frontal non yá contra les instituciones europees sinón contra’l propiu sentíu común. Eso ye lo qu’ocurre cuando s’acusa a Pablo Iglesias de moderar el so discursu: nel fondu, si eso ye tan grave ye porque pon en cuestión el paradigma hermenéuticu oficial, ello ye, l’intentu de facer pasar a les instituciones europees por paladines de la racionalidá y el diálogu frente a la llamuerga de baxes pasiones onde calen Syriza y Podemos de la mano de Le Pen. Va llovenos abondo d’esa indignación. La indignación de los mercaos contra’l márketing de los indignaos.

Le Pen nun ye, nin va poder ser nunca, una enemiga efectiva de les polítiques austericides, porque la so oposición a la Troika nun ye otra que la del desamparu prepolíticu de quien pide por un proteccionismu nacional que lu defenda del proteccionismu de les multinacionales. Hasta ehí llega tola posible concesión d’esi Frente Nacional a un movimientu democráticu de base amplia que pue que tenga en Syriza’l so referente políticu más claru. D’ehí que vienda como motivu de celebración lo que, pa les clases más castigaes poles recetes de la Troika, nun ye efectu sinón causa posible d’un cambiu políticu. El fracasu de Samaras nun ye motivu de gayola por escures razones antisistema, sinón pola posibilidá qu’implica de que’l país más castigáu polos planes del FMI enverede un futuru en clave democrática.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s