Col sudu d’otra frente

El mitu bíblicu de la creación concéde-y al sudu un papel piqueru como fuerza productiva. “Vas ganar el pan col sudu de la to frente”, diz-y Dios a Adán, de la que lu espulsa del paraísu. Adán, que sepamos, nun-y preguntó al creador qué yera’l sudu, d’onde podemos conxeturar que nel Edén tamién se sudaba. De placer, pero sudábase. Dizlo la Biblia.

Esa manera d’interpretar la prehistoria, mui asemeyada en cultures bien diverses, indica que, hasta ciertu puntu, naide aspira a ganar el pan colos brazos cruzaos. Digo “hasta ciertu puntu” porque siempre hai escepciones, y eses escepciones constitúin el fundamentu psicolóxicu de les xerarquíes sociales. Cierto qu’en munches sociedaes les castes dirixentes, les elites dominantes, lexitimen el so poder pola posesión d’un conocimientu espertu, pero’l rasgu xenéricu que toes eses elites comparten a lo llargo y ancho de la historia y la xeografía ye una tendencia innata a nun pegar palu al agua.

La condición sine qua non d’esi ociu espertu ye que’l conocimientu péritu y el trabayu manual los desendolque otra xente. Xente que tendrá tamién un enclín biolóxicu a nun trabayar más de la cuenta, pero que pola fuerza de les circunstancies, o pola fuerza a seques, acaba esllombao en reduñes de la clas ociosa. Como les estructures macrosociolóxiques suelen replicase a escala micro, en cualquier grupu humanu qu’observemos podemos atopar traces d’esa tendencia global. Siempre hai ún que diz eso de “había que llamar al ayuntamientu pa qu’arreglen esto, ¿llames tu?”. Si-y respuendes que llame él, siempre te diz que nun tien tiempu o nun tien saldu o nun tien móvil, pero nenguna de les tres coses ye una certeza científica. Lo que sí ye una certeza ye que yes tu’l qu’acabará llamando.

Folgar ye un arma de destrucción d’inútiles. Dizlo la historia universal: nun hai ferramienta más poderosa qu’una fuelga si de lo que se trata ye d’apavoriar a esa minoría d’aprovechaos que nun sabe facer otro que fagocitar el trabayu ayenu. El famosu “circulen”, tan asociáu al vocabulariu policial, espresa esi terror del poderosu a tener qu’apañáseles solu: la molición más grande de la clas ociosa presenta la figura d’un trabayador inmóvil.

Tamién, nostante, la cultura de la emancipación vien llastrada con esi pecáu orixinal. Solo que, una y bones la nuestra yá nun ye una mentalidá onde l’ociu seya motivu d’arguyu (hasta los reis dicen que trabayen: Lluis XVI revolveríase na tumba), presumir de trabayar muncho nun ye incompatible con intentar vivir del sudu d’otra frente. Sábenlo toles muyeres que, atrapaes nuna xornada llaboral continua, de sueñu a sueñu, tienen pa enriba qu’escuchar los llamentos del home qu’en llegando a casa esixe que-y lo dean too fecho. Sábelo tamién el vagu profesional que recurre a la so procedencia social como un méritu pa esprecetar de cualquier esfuerzu ayenu. Lo malo de los males bíblicos ye que suelen ser bien reales. Tenémoslo francamente difícil pa desfacenos d’esa carga atávica.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s