3+2=5 (Dios mediante)

En historia es el primero,
en latín es el mejor.
Él va a clase aunque haya huelga
y entretiene al director.
Sus amigos lo idolatran,
lo quieren embalsamar
para hacer un monumento
al estudiante ideal. 
Los Twist, “El estudiante”

Asina vamos. Resulta que la civilización occidental anda a sucu baxeru por culpa de que yá naide sabe quién manda nin quién obedez, y porque’l que nun tien claro qué sitiu-y correspuende, mal va a acomodase a defender l’orde natural de la convivencia. Compréndese asina que la relixón vuelva a ser materia d’esame y que se sustituya la evaluación pola absolución: necesitamos valores eternos que nos envereden, a nun ser que nos conformemos con que la dexeneración llegue al límite y acabemos siendo toos gobernaos pol ISIS. Con too y con eso, pue ser que la escayencia nun se cure con eso namás, porque los nuestros cuadros dirixentes necesiten, nel fondu, dalgo más que rosariu y ciliciu pa facer que funcionen los presupuestos xenerales del estáu, asina que dalgo va haber qu’inventar pa formar a eses elites que creen empléu, felicidá y orde social.

De momentu, nesa dirección camina’l máster universitariu, un conceptu difusu pero fácil d’utilizar en circunstancies d’emerxencia social: nun va haber empleos d’alta cualificación pa los que nun vaya a ser necesario disponer d’esa titulación. El máster apúrre-y al estudiante tolo qu’esti nun obtuvo peles víes ordinaries: formación, disciplina intelectual y relaciones sociales. Hasta llegar al máster, la función de la universidá tendrá que ser la que vien cumpliendo últimamente: evitar que la mocedá desempleao pierda’l tiempu folgando o delinquiendo. Los resultaos empezarán a vese cualquier día d’estos, mui probablemente al mediudía.

Mentanto, siguiremos asistiendo a paradoxes cuántiques, como qu’una multitú de mozos y moces aspirantes a salarios de miseria en cualquier cadena de comida rápido, salga manifestándose contra la reducción del so tiempu d’estudios. ¿Nun quedáremos en que los estudiantes nun teníen otra ambición que la de nun dar palu al agua? ¿Acasu nun se rebaxó de cinco a cuatro años la duración de los estudios universitarios, comprimiendo les vieyes llicenciatures en títulos de grau que te capacitaren esactamente pa lo mesmo, ello ye, pa tar en paru pero con cultura? ¿Compréndese qu’esos estudiantes desmotivaos y mal formaos se movilicen contra una midida que los fai cultos un añu primero? Comprender, nun se comprende. Seyamos ortodoxos y pongámos-y una vela a San Pancracio, que seguro que nos alluma ensin necesidá d’analizar nada.

Ciertamente ye’l mundu al revés: estudiantes que quieren estudiar más, que nun se conformen con un títulu que, a poco que se racionalice la función pública, va poder comprase nos estancos, igual que la bonoloto o’l tabaco de liar. voi a echar la primitiva y a por un grau en matemátiques. En cuenta d’aceptar que’l mundu necesita repoblase, y especialmente Europa, van estos guajes y reivindiquen el so derechu a obtener una educación superior de calidá, gratuita y universal, posponiendo sine die’l cumplimientu del mandatu divín de casase y tener fíos. Yá nun saben qué facer pa llamar l’atención.

Hai un cuartu de sieglu, la mayoría de les carreres universitaries duraben cinco años. Depués podía ún doctorase, si lo que quería yera un títulu que lu capacitare pa exercer d’elite ensin cobrar por ello. Cuando se rebaxaron les carreres a cuatro años y se xeneralizó’l conceptu d’asignatura cuatrimestral, dalgún voceru del apocalipsis suxirió que, o reinventábemos la pólvora, o lo dicho: l’ISIS o paecío. De poco val anguaño comparar aquello con esto y axitar a les mases cola idea de qu’agora, pa sacar una llicenciatura de cinco años, vas tener que pagar dos: el conceptu de 3+2 (tres cursos pa un grau y dos más pal máster) evidencia que, por andar xugando a les pedagoxíes igualitaries, tócanos agora empezar cuasi de cero y reforzar a les elites con un superávit simbólicu ensin teneles estudiando siete años y otros cinco faciendo una tesis doctoral sobre la humedá nos secaderos de corchu. Total, pa mandar nun fai falta más que saber que van obedecete. O tener munchos tanques, que tamién ayuda.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s