Sutures

Hai un cuartu de sieglu, Alain Badiou firmaba un de los testos más apasionaos en defensa de la filosofía que, al mesmu tiempu, resultaba ser un de los más inútiles. Nenguna de les sos predicciones lleva güei camín de cumplise, y a la postre pue ser que yá daquella, venticinco años atrás, fuera fácil decatase de la imposibilidá d’esi cumplimientu. Al empar qu’analizaba y cartografiaba les diverses crisis del saber filosóficu, Badiou proclamaba un retornu de la filosofía dende les sos condiciones contestuales, avanzando que tolos supuestos deslexitimadores del saber filosóficu (“sutures”), consistentes en supeditar la filosofía a otros códigos (la política, la ciencia, la poesía), yá taben agotaos y dábase por fin el contestu afayadizu pa que’l discursu filosóficu volviera a ocupar el puestu de primacía que-y correspondía por derechu.

Con frecuencia los filósofos franceses interpreten los males (y los bienes) de la filosofía como afecciones d’un cuerpu funcionarial concretu, a saber, el de los profesores de filosofía de la república francesa. Fuera d’esi elementu, allóngase la nada más pura, onde naveguen y naufraguen millones de cerebros ensin utilidá bultable. Nun paez, en cambiu, que fuera del so entornu gremial heba muncha preocupación pol presente y el futuru del saber filosóficu. Ún diría, pela cueta, que poco s’espera d’un tipu de discursu que lleva sieglos instaláu na crisis, a lo menos nos países del sur d’Europa. Como los anglosaxones yá arrenunciaron a hexemoníes abstractes cuando la batalla de Hastings, y como a los árabes nunca se-yos pidió en serio la opinión, los destinos de la filosofía solo foron un tema interesante en tierres alemanes y franceses, hasta’l puntu de que la historia de la filosofía nos últimos trescientos años pue lleese como un llóbregu tornéu de tenis ente dos equipos disfrazaos alternativamente d’enterradores y resucitadores. El restu, aplaudimos o esbocexamos, según nos dea.

Pamidea, la mayor muestra d’inxenuidá de Badiou tuvo en considerar que les crisis sucesives de les ciencias formales podíen disolver el discursu positivista y el relatu correspondiente del endelgazamientu progresivu de la filosofía en beneficiu de les ciencies. Bien poco acusada foi esa disolución. Ún diría incluso que foi a la inversa y que, namás firmar el certificáu de defunción de les matemátiques, foi la propia filosofía la qu’entonó’l Nunc Dimittis. En cualquier casu, pa poca cosa valió razonar que nun ye ciencia cualquier forma de discursu onde podamos enxertar un gráficu con porcentaxes. La inercia social sigue siendo la mesma, a lo menos nesta tierra: si ye cuantificable, ye científico.

Mandándose d’un instrumentu tan aparentemente asépticu como la estadística, armóse nos últimos decenios un exércitu d’aspirantes a científicos conocíos popularmente como “politólogos”. Nun ye esti’l momentu nin tampoco’l sitiu pa pescudar si ye dable concede-yos el títulu pol que nagüen. En realidá, nin siquiera ye útil: cuando’l clima social reconoz un discursu como ciencia, ciencia ye, quitando pa dalgún filósofu francés y la so atenta grea de siguidores. Los demás quedamos mirando con un aquel de suspicacia, como si esti episodiu yá lu viviéremos o, a lo menos, yá lu lleéremos. La pregunta que queda nel aire ye más bien otra: esti ésitu social y epistémicu de la politoloxía ¿implica una refutación de la hipótesis de Badiou y, polo tanto, un postergamientu d’esi retornu triunfal de la filosofía hasta dientro d’otros milenta años? ¿O ye más bien la muestra de que’l sistema educativu español sigue ancláu nuna sutura del pasáu y, por tanto, con fecha de caducidá a la vista?

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s