Los que tienen que sirvir

Hailos que nun necesiten nenguna reforma del Códigu Penal, qu’ellos solos se tapen la boca o, como muncho, namás la abren pa facer piña cola oligarquía. Pa facer esa piña namás que necesiten una cuenta en Twitter y restolar a la busca d’elementos como esi tal Xandru Fernández qu’escribió, mira tu pa él, “oligarquía”, juas juas, emoticón partiéndose la caxa. Refiérome a xente que tien la suerte de contar con un detector de términos potencialmente risibles, ente ellos “oligarquía”, pero tamién “pueblu”, “clase obrera”, “llucha de clases” o cualquier espresión que suene un poco a manual de Marta Harnecker. Nengún d’esos creadores d’opinión, o alpenes un puñadín d’ellos, lleó nada de Marta Harnecker, pero alimentáronse colos prexuicios de mentores que sí la lleeron, munchos d’ellos con devoción incluso, enantes del previsible desencantu.

Periodistes, escritores y profesores, por mencionar namás que tres profesiones difuses y confuses del gremiu de trabayadores de la ideoloxía, furrulen, igual que los demás mortales, d’alcuerdu con unes pautes culturales y biolóxiques y mui davezu como partes indistinguibles d’un cuerpu colectivu. Asina, nun ye nengún secretu qu’una parte d’esa colectividá, la parte de mayor edá y esperiencia, militó formal o informalmente na esquierda política nos años sesenta y setenta p’arrenegar, en llegando al poder el PSOE, d’aquellos compromisos históricos de la so mocedá. A eses persones quedó-yos un bagaxe cultural y políticu que, con rancura o ensin ella, lexitímalos pa usar y criticar con propiedá un discursu que, les más de les veces, intenten ridiculizar como si fuere una llocura xuvenil tan difícil de reivindicar como los discos de Cecilia. Tán depués los fíos o hermanos pequeños d’esa xeneración, los que llegaron (lleguemos) a l’arena política cuando’l referéndum de la OTAN, más o menos, y que, anque tuvieren (tuviéremos) tamién les sos ortodoxes, acusaron recibu d’esi desencantu ayenu y entamaron la so propia trayectoria a partir d’esi desencantu y envolubraos de cinismu preventivu. Queden, finalmente, los que saltaron a l’adolescencia na época de les Mama Chicho, una xeneración post soviética a la que yo personalmente tiendo a supone-y cierta claridá na mirada y munchos menos prexuicios llingüísticos.

Por eso nun dexa d’asombrame la ductilidá con que dellos presuntos progresistes s’amolden a conductes que pa mi, que-yos saco a lo menos un deceniu, abúltenme mayuques por nun dicir que pura antigualla. Esti últimu añu ta sacando lo meyor y más vergonzoso d’esi colectivu amigu d’identificase con cantautores con canes y piscina privada qu’amiren pa la escena política con güeyos avieyaos y chistes que yá yeren malos na época de los cineclubs. La simple convocatoria d’un referéndum nun llugar tan distante como Grecia enllénalos d’una soberbia que pa él la quixera Joaquín Leguina. Faltos de les llectures de los sos guíes espirituales, nin siquiera-yos algama’l xuiciu pa ver nellos mesmos la ilustración viviente d’una hexemonía cultural agonizante. Nada que nun podamos atopar n’otros sectores de la nuestra sociedá, pero que nesti casu, al tratase de xente que contribúi al desenvolvimientu públicu d’una determinada ideoloxía, choca y da repilu poles mesmes razones poles que choca y da repilu ver a dalguién que quier borrar una pizarra con un borrador llenu de tiza: la única esplicación pa esa conducta irracional ye qu’esi suxetu nun quier borrar sinón facer como que borra, nun quier sirvir sinón mostrase servil. Cronistes d’un tiempu nuevu que se vuelven la encarnación periodística d’aquel personaxe de Atraco a las tres: “Fernando Galindo, un admirador, un esclavo, un amigo, un siervo”.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s