Los indiferentes

Una persona va caminando tranquilamente y, de sópitu, cai-y un pianu na cabeza. La persona muerre. Los güesos del crániu nun soporten el trallazu. Dende’l puntu de vista médicu, da lo mesmo que’l pianu cayera por azar (porque rompiera la cuerda que lu tresportaba nuna mudanza, por exemplu) o pola voluntá de dalguién (hai asesinos ciertamente sofisticaos). El resultáu ye esactamente’l mesmu: muerte por contusión con pianu.

Los medios difunden estos díes les imáxenes de milenta persones intentando atopar abellugu n’Europa. Ún diría que los europeos que vemos eses imáxenes debiéremos reaccionar toos d’un xeitu asemeyáu, igual que díbemos reaccionar de la mesma manera si a caún de nós-y cayera un pianu na cabeza. Paecería lo esperable un común sentimientu d’empatía, simpatía o compasión (les diferencies de matiz ente esos tres términos vamos dexales pa otru momentu). Nostante, da a veces la impresión de que, nel intervalu fugaz que trescurre ente la percepción d’eses imáxenes y la respuesta emocional producida por estes, los seres humanos somos capaces d’activar asociaciones mentales que faen más o menos intensa esa respuesta: danos por pensar si eses persones serán musulmanes, si Europa va poder acoyer a tanta xente, si taremos siendo víctimes d’un complot mediáticu o si habrá intereses políticos que saquen rentabilidá de la nuesa indignación.

Cierto que los güesos del crániu y les conexones neuronales nun son elementos comparables: el güesu, pa romper, nun necesita analizar les condiciones en que’l pianu impactó contra él. Pero si en llugar d’un pianu ye una vara d’ablanar, de manera que’l verdiascazu manque ensin ser mortal, pue ocurrir que reaccionemos gritando, llorando, revolviéndonos contra l’agresor  o, tamién, quedando impasibles, sorriendo, aguantando’l dolor ensin mover un músculu. Tenemos capacidá pa reprimir ciertes reacciones, anque’l dolor lu sintamos lo mesmo.

Esta selmana circuló peles redes sociales una foto del presidente del gobiernu español xunto a un periodista radiofónicu, los dos sorrientes, mientres nel portátil del periodista se ve con claridá la fotografía del calabre d’Aylan, el nenu siriu qu’apaeció muertu na playa turca d’Ali Hoca Burnu. Podemos facer un esfuerzu (yo quiero facelu, polo menos) y pensar que’l presidente, que dende’l sitiu onde ta nun pue ver qué hai na pantalla del portátil, nun ye consciente del horror iconográficu en que ta participando. Yá resulta un poco más difícil, por nun dicir imposible, concede-y esi atenuante al periodista, que tien el portátil abiertu al par d’él, pero vamos intentalo, vamos facer por creer que llevaba un cachu ensin mirar pa la pantalla y nun yera tampoco consciente de tar participando nuna burlla macabra.

¿Llega la nuestra buena voluntá al estremu de suponer que tampoco’l fotógrafu se decató de lo que taba fotografiando? ¿Qué naide del personal del presidente revisó esa semeya enantes d’echala a andar pel mundu alantre? ¿Xente que paga cifres astronómiques a asesores d’imaxe y community managers dexaron pasar esa chapuza? Parafrasiando a Gila, ye demasiao suponer pa un adultu. En dalgún momentu tenemos que nos rendir a la evidencia de qu’hai ehí un elementu de provocación o d’indiferencia.

Ente lo uno y lo otro, qué más quixera ún que fuera una provocación, incluso que lo planificaren adréi: depués de too, si quixeron facer una gracia, dar que falar o escandalizar a dalguién, hai marxe pa figurase que, enantes d’esa decisión, hubo un momentu en que los dos reaccionaron con empatía, anque fuera namás qu’un instante fuxidizu. Peor ye, en cambiu, la sospecha de que foi simple indiferencia y esos dos personaxes son incapaces de conmovese énte un horror tan evidente. La sospecha de qu’en ciertos ambientes y con ciertes persones val lo mesmo un nenu muertu qu’un salvapantalles de Windows.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s