Cumpleaños feliz

Supimos esti día qu’un informe del brazu derechu del ministru Soria proponía eliminar les emisores comunitaries de radio y televisión, una categoría xurídica reconocida pola Llei Xeneral Audiovisual de 2010. Nesi informe apruz con claridá envidiable la concepción que’l gobiernu del PP tien de los medios de comunicación, dalgo que cualquiera podía aldovinar a poco que siguiera les desiguales aventures d’esi partíu na xestión de medios públicos o los sos tratos con empreses de comunicación de capital privao. Tamién vien a confirmar que’l PP ta emperráu en perder con solemnidá les elecciones d’avientu, anque nun diba ser la primer vez qu’esti calabre reviviera xusto pa los responsos (yo, polo menos, hasta que nun pueda emburrialu con un palu, nun voi ser pa creer que seya tal calabre).

Sicasí, esa especie de mapa del tesoru mediáticu firmáu pol director del gabinete d’Industria difundióse la mesma selmana qu’escoyó la Conseyería d’Emplegu del gobiernu asturianu p’archivar l’espediente sancionador en marcha contra Radio Kras: precisamente un instrumentu de comunicación que forma parte d’esa categoría que’l director del gabinete d’Industria quier desaniciar. Que la decisión final la adopte’l gobiernu asturianu, mientres que l’espediente sancionador lu iniciara’l ministeriu d’Industria, pudiera seique interpretase como un pulsu de competencies o colores políticos, de nun ser porque la esperiencia nun invita a ser tan indulxentes: tamién gobernaba’l PSOE cuando se-y retiró la llicencia a Radio Sele, y ta por ver que’l d’agora seya’l primer gobiernu asturianu que defende competencies frente al gobiernu español.

Les teoríes de la conspiración cárgales el diablu. Hai quien pudiera ver nesi informe ciertu enfotu en beneficiar a unes empreses en perxuiciu d’otres, y tamién pudiera vese nél la intención de tapar boques critiques: nun ye nada aventurao pensar que l’esperimentu de La Tuerka, el programa de Pablo Iglesias na comunitaria Tele K, taba na mente del funcionariu cuando escribió eses llinies. Claro que tamién podía pensase que les sos suxerencies sobre los derechos del fútbol apunten a perxudicar a Mediapro, la productora de Jaume Roures que-y fizo un ERE al diariu Público y mandó a los trabayadores de La Voz de Asturias al paru y a Fogasa. Otra vez sal equí Pablo Iglesias, esta vez como convidáu a la fiesta de cumpleaños de Roures, que tamién se celebró esta selmana: somos munchos los qu’equí nun-y mandábemos siquiera un telegrama al millonariu que, enantes de pega-y a La Voz de Asturias el tiru de gracia, fizo como que la reflotaba a la vez que-y vendía a la TPA los derechos de la Fórmula 1 (seguramente una coincidencia d’eses que tan cares nos salen a los asturianos). Nun m’importa repetime: les teoríes de la conspiración cárgales el diablu; pero ye fácil que lo faiga con munición real.

Ente verdaes a medies, verdaes enteres y falsedaes convictes y confeses, ye fácil resbariar pel terrén de les rocees, les sospeches y les intrigues. Más granible paez quedar coles poques certeces d’altor moral que nos salen al pasu: coles batalles ganaes a fuerza de nun ceder un milímetru a amenaces y sobornos. Asina, igual que quixi celebrar un triunfu, por tardíu que fuera, que tuviera como protagonistes a los trabayadores de La Voz de Asturias, apetez celebrar el triunfu de Radio Kras agora que se cumplen trenta años desque emitió per primer vez. Trenta años que vieron llegar y marchar a unos cuantos ministros d’Industria y a más d’un director de gabinete y nos que foi, finalmente, una emisora pequeña, popular y irreverente la que ganó’l combate mientres alredor se malvendíen medios públicos y privaos y s’especulaba cola información igual que con munches otres mercancíes. A un cumpleaños como esi sí presta que te conviden.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s