Retratu de grupu en bancu d’acusaos

Estándar

Hai un fechu diferencial asturianu. Resulta qu’en tol reinu d’España la pallabra “marea” suena a reivindicación social, ye parte de la sutura política con que se pensó estos últimos años la crisis del réxime, mientres qu’equí tien visos de vergüenza, o más bien ye síntoma y consecuencia de la sinvergonzonería política y empresarial que nos gobierna dende tiempos non necesariamente meyores. “Marea” soldóse d’una vez pa siempre con “casu” y, na memoria d’estos años, la nuestra indignación nun va ser causa de nenguna marea nin verde nin blanca nin de nengún otru color sinón efectu xudicial d’un empoderamientu más básicu y tradicional, a saber, el de les elites y los sos mercenarios funcionariales.

El xuiciu del casu Marea ta siendo menos espectacular de lo que merecen tanto’l guión como les dotes interpretatives de los sos actores. Ex cargos d’una conseyería d’educación sienten delantre’l xuez al par d’empresarios d’aquellos que marcaben la pauta y yeren l’exemplu del triunfu social nos años del boom inmobiliariu. Con ellos sienta tamién delantre’l xuez un estáu d’ánimu, una manera de guardar silenciu: el laissez faire énte los trebeyos de los poderosos. ¿De qué otra manera hai qu’entender qu’en tantos años lo que yera cuasimente vox populi nun algamara a sustanciase en sumariu nengún, nin siquiera nuna investigación policial d’eses qu’acaben con sobreseimientu y hasta con aplausu y homenaxe, lléase casu Campelo? Pescudar el grau de conocencia qu’había na comunidá educativa de los fechos que se xulguen estos díes ye dalgo más qu’un exerciciu interesante de memoria. Pertenez a eso que podíemos llamar “socialización de la vergüenza”.

Sicasí, que fueren munchos los conocedores nun quier dicir que fueren tantos los instigadores, los beneficiarios o los delincuentes. Cualquier funcionariu pue dexar constancia de los fumos y maneres que gasten los llamaos “superiores” a la que ven qu’un “subordináu” amenaza con espresar una dulda o una oxeción. D’esto nun yera escepción la conseyería d’educación de los años d’Areces, onde por mor d’un mecanismu perconocíu, y consistente en fuxir p’arriba y quemar pontes a midida que’l suxetu se distanciaba de la tiza, nun faltaben nin siquiera los modales cuarteleros a la hora de tapar boques critiques. A naide que trabaye na educación asturiana-y va chocar gota esi rosariu d’irregularidaes que vien nos periódicos. Seique-y choque únicamente que nun sían más los implicaos.

Esa foto de familia, cuasi obscena, d’acusaos que se faen les víctimes, que se les dan d’ofendíos, que se vienden unos a otros con tal de salvar, hipotecándola, lo poco que-yos queda de dignidá, ye mal consuelu y dixerse mal por munchu ánimu revanchista qu’ún quiera echa-y al asuntu. Nesa foto apaecen los mesmos rostros cuasimente qu’en munches inauguraciones de cursu, onde aprovechaben pa inaugurar aularios o anunciar secciones billingües, dotaciones informátiques o programes de recuperación pal alumnáu en riesgu d’abandonu. Ente una foto y otra nun cai solo’l prestixu de los retrataos, nun ye solo la escayencia d’un grupu d’aprovechaos lo que contemplamos agora nesa composición goyesca: lo que va d’un tiempu a otru, d’una semeya a otra, ye la vida llaboral del políticu profesional nun ecosistema onde, hasta agora, eses conductes yeren aplaudíes, imitaes y premiaes con votu masivu y repartu de prebendes. Bien valía enmarcala y regala-y una copia a cada conseyeru, director xeneral y xefe de serviciu cola lleenda clásica de les calaveres medievales: “Como te ves yo me vi. Como me ves te verás”. Pa evitar que se repita (más) la historia.

 

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s